Manfred Vallazza

Candidat dla Südtiroler Volkspartei por le Consëi provinzial

Politica ó dí por me fá val’ por nosta patria. Chësta patria m’á dé döt.
I sun chersciü sö y i viri söl lüch de familia Survisc a La Val, olach’i á bele da pice insö daidé para y m’á fistidié di tiers te stala. Tl 2008 ái podü – sciöche le maiú de cater mituns – surantó le lüch da paur. Vigni de laori söl lüch deboriada cun mia familia, cun gran ligrëza y tröpa forza.

Tl cör sunsi n paur che á ion i tiers y n ostí sön le lüch. De mistier sunsi secreter spezialisé sön i contribuc por i lüsc da paur. Chësc compit me dá la poscibilité da aconsié y daidé inant porsones.
I á podü fá la scora agrara a Auer. Al é na scora ezelënta, olach’i á imparé tröp y ci ch’i á imparé pói adoré ciamó incö te mi laur. A me personalmënter, me dál ince dër tröp da fá volontariat. A chësta manira pói ti pité mi sorvisc ala comunité.

I candidëii, deache…
… i ó me dé da fá por mantigní la cultura y i valurs tirolesc y por fá che nosta patria restes, ince por les generaziun che vëgn do, n post olach’an se vir saurí.

N valgügn dac sön mia porsona:

Inom y cognom: Manfred Vallazza
Data de nasciüda: 08.03.1978
Post de nasciüda: Bornech
Residënza: La Val / Lüch de Survisc
Stat de familia: i viri adöm cun mia compagna
Mituns: un n möt
Sëgn zodiacal: pësc
I mangi le plü ion: gnoch da zigher
Formaziun: scora agrara a Auer
Mistier: paur cun pasciun, ostí sön le lüch y secreter spezialisé sön i contribuc por i lüsc da paur

Ativités de volontariat:

Assessur de Comun y mëmber dla Comisciun por le frabiché a La Val
Presidënt dl Grup d’aziun locala – „Lokale Aktionsgruppe (LAG)“ – de Puster
Presidënt dla Vijinanza da Cians
Surastant raional dla Uniun di paurs de Südtirol - Val Badia
Mëmber dl Consëi di paurs dl paisc da La Val
Mëmber dla Jonëza da paur de Südtirol
Surastant local y raional dl grup SVP Val Badia
Mëmber dl Comité de partí dla SVP
Mëmber dl Comité dla musiga da La Val
Scrivan dla Comisciun di lüsc da paur
Mëmber dla Comisciun che planifichëia tan de salvarjins che pó gní copá
Comité de gestiun dl Parch natural Fanes-Senes-Braies

Mies ghiranzes politiches

L’agricoltöra, le turism, l’artejanat, la cultura y les usanzes é les fondamëntes de nosta beliscima patria. Cun gran convinziun me dái da fá por mantigní la contrada culturala de Südtirol.

I ó sostigní na convivënza te na sozieté solida che sides iüsta, che veles por dötes les generaziuns y che fejes sté saurí. La contrada curada de Südtirol é la fondamënta dla richëza de nosta tera y la basa por le turism alpin. Dantadöt i afitaciamenes privac, i paurs che afita ia ciamenes sön so lüch y les pices strotöres laora por chësc. Porchël ési da mantigní y da sostigní.

Chëstes tematiches me stá a cör:

Independënza: I paurs ne dess nia messëi lauré le dopl por podëi suravire! An mëss fá a na manira che le laur sön le lüch ti portes davëi n davagn ales families da paur.
Leges tleres y smendrí la burocrazia: Nos paurs ne sun nia burocrac! I ghirun razionalité tla politica y tl’aministraziun y nia tres indô formulars nüs. Le laur da paur adora autonomia por ch’al pois se svilupé te na manira sana.
Mantigní i lüsc stlüc: Da partí sö i lüsc ne vára nia da davagné. Ma sc’an pó ince davagné val’, gnarál lauré inant le terac, le bosch y la munt. Tröpes families se tira le vire cun chësc laur, implü él ince la premissa por n turism che florësc.
Ciaré dles pices aziëndes: Al ne pó nia ester che de pices aziëndes mësses se tigní a diretives tres plü rigoroses y ne ciafes nia contribuc. Chiló ói lauré decuntra!
Prisc iüsc: I messun ti fá aprijé ai consumadus i produc dl post. Nos paurs sun por la cualité y la sostignibilité. La maiú pert dla jënt sá le prisc de n produt, mo che conësc pa so dër valur?
Ti dé deplü pëis ala formaziun profescionala: I messun ti dé la poscibilité ales generaziuns che vëgn do da podëi se formé sciöch’al toca y aladô di tëmps d’aldedaincö. I messun i sostigní te süa creativité y da tó instësc iniziatives.
Vire les tradiziuns: La troht, les festes tradizionales y les tradiziuns é perts essenziales de nosta cultura tiroleja. I messun les coltivé y les mantigní. Les usanzes é l’espresciun dla tradiziun. Coltivé les usanzes ó dí, da me infora, ciaré dla patria.
Cherta d’identité dopla: Deache la cultura tiroleja á sües raisc tl’Austria sunsi por la cherta d’identité dopla.
Uniuns y volontariat: Les uniuns surantol compic soziai importanc. Ares dá la poscibilité da sté adöm y da svilupé la personalité de vignun. Ares surantol les funziuns de integraziun y sozialisaziun. Ares é n post sigü te nosc monn che vá tan debota y é tan busiënt, porchël mëss le volontariat gní valorisé deplü.
Defenüda dla proprieté: Ai lüsc da paur ti vëgnel metü dant tres plü desposiziuns y proibiziuns, sciöche i raiuns Natura 2000, raiuns de respet dla salvarjina, desposiziuns sön la boacia y tröpes d’atres. Al ne pó nia gní esproprié por nia. Sc’al mëss gní esproprié por le bëgn dla comunité, spo dess l’indenisaziun corespogne al valur de marcé dl grunt.
Regolamentaziun di trus da jí a pe y da jí cun la roda: An mëss lauré fora regoles tleres deboriada cun i proprietars di terac, i responsabli dl turism, i verdabosch y la lia da munt de Südtirol por amarscé y despartí i trus da jí a pe dai trus da jí cun la roda da munt.
Porté inant la digitalisaziun y tó ite i raiuns periferics: Te tëmps olache la digitalisaziun é tres plü importanta, é les aziëndes plü piceres liades a n internet funzional y asvelt por podëi lauré bun tl’economia. I sun por ch’al vëgnes sposté posc de laur ti raiuns periferics. Insciö ne mëss tröpes porsones nia plü jí a lauré te cité. Chësc é ince n vare por smendrí le trafich che crësc tres deplü y por fá jí a öna les esigënzes dla familia cun chëres dl laur.

„Tüa usc por na patria iüsta y olach’an pó s’un sté saurí“

Lites provinziales 2018

AN LITA INSCIÖ:
Ai 21 d’otober podëise dé jö Osta usc por le Consëi provinzial de Südtirol. Atira do che les sëntes litales á saré, vëgnel cumpedé fora les usc te döta la provinzia.

Ne stede a Ves desmentié la cherta d’identité y la cherta da lité. Les sëntes litales é davertes te düc i comuns dales 07:00 ales 21:00.

Lites provinziales ai 21 d’otober 2018 www.svp.eu | facebook.com/suedtiroler.volkspartei